Hay'adda Isgaarsiinta Qaranka (HIQ) waxay dhistay Xarunta Kormeerka Hirarka (Spectrum Monitoring Center), taasoo ah xarunta dhexe ee laga hago lagana maamulo shabakadda isku-dhafan ee xarumaha kormeerka hirarka ee joogtada ah iyo kuwa guurguura ee Soomaaliya.
Xaruntani waxay ku qalabaysan tahay barnaamijyo iyo agab gaar ah oo si buuxda ugu xiran server-rada saldhigyada kormeerka, si looga maamulo dhammaan hawlgallada saldhigyadaas.
Xaruntu waxay awood u leedahay:
- Marin uhelid iyo isgaarsiin toos ah dhammaan saldhigyada go'an, kuwa TDOA iyo kuwa la qaadan karo (Portable spectrum monitoring);
- La socodka hirarka waqtiga-xaadirka ah iyo duubistooda;
- Ogaanshaha goobaha ay ku yaallaan ilaha isgaarsiinta wireless-ka;
- Awoodda soo saarista iyo daabacaadda warbixinnada; iyo
- Kaydinta xogta iyo samaynta nuqullo kayd ah.
Xarunta Kormeerka Raadiyaha waa mid ka mid ah hababka lagu baaro hawlaha korantada-magnetiga ah (electromagnetic) ee ka dhaca gudaha xuduudaha hirarka raadiyaha ee dalka, sidaas darteedna waa qayb lagama maarmaan ah oo ka mid ah Maareynta Hirarka. Waxay ka mid tahay hababka lagu kormeero laguna xakameeyo isticmaalayaasha hirarka, sidoo kalena waxay door muhiim ah ka qaadataa qorshaynta qoondaynta soo noqnoqoshada hirarka.
Sidaas darteed, kormeerka wax-ku-oolka ah ee hirarka raadiyuhu wuxuu yareeyaa carqaladaha waxyeellada leh ee ay sababaan isticmaalayaasha hirarka, wuxuuna xoojiyaa badbaadada nafta iyo hantida, isla markaana kor u qaadaa dakhliga Dowladda.
Hay'addu waxay qabataa hawlo kala duwan oo la xiriira kormeerka hirarka, kuwaas oo ay ka mid yihiin:
- Hubinta u hoggaansanaanta (Ensuring compliance): Hubinta in qalabka iyo adeegyada raadiyuhu ku shaqeeyaan inta jeer ee loo qoondeeyay iyo sida waafaqsan heerarka la dejiyay.
- Ogaanshaha faragelinta (Detecting interference): Aqoonsiga iyo helidda goobaha ay ka soo baxaan carqaladaha hakad geliya isgaarsiinta raadiyaha.
- La socodka tayada adeegga (Monitoring quality of service): Qiimaynta waxqabadka shabakadaha isgaarsiinta iyo adeegyada, iyadoo la hubinayo inay buuxiyaan heerarka loo baahan yahay.
- Maareynta qoondaynta hirarka: Horumarinta iyo joogteynta Shaxda Qoondaynta Hirarka ee Qaranka (NFAT) si loo hago isticmaalka hirarka raadiyaha.
Nidaamyada La Socodka Hirarka:
- Xarumaha kormeerka ee joogtada ah (Fixed monitoring stations): Saldhigyadan waxaa la dhigaa meelo istiraatiiji ah si loo la socdo isticmaalka hirarka loona ogaado faragelinta.
- Nidaamka kormeerka hirarka ee dhabarka lagu qaato: Qalabkan waxaa loo isticmaalaa baaritaannada gaagaaban iyo daboolida baahiyaha aagagga gaarka ah.