Iyada oo qayb ka ah dadaallada qaran ee Soomaaliya ee lagu yareynayo khataraha musiibooyinka, Hay'adda Isgaarsiinta Qaranka (HIQ) waxay door muhiim ah ka qaadataa Hindisaha Digniinta Hore ee Loo Dhan Yahay (EW4All), oo ah barnaamij caalami ah oo ay hoggaamiso Qaramada Midoobay, kaasoo lagu xaqiijinayo in qof kasta oo dunida ku nool ay gaaraan nidaamyada digniinta hore ugu dambeyn sannadka 2027.
Hay'addu waxay hoggaamisaa Tiirka 3-aad: Baahinta iyo Gudbinta Digniinaha, iyadoo ka shaqeysa xaqiijinta in digniino waqtigooda ku habboon oo lagu kalsoonaan karo ay bulshada ku gaaraan shabakado isgaarsiineed oo adkeysi leh.
Arrintani waxay u baahan tahay wada-shaqeyn dhow oo lala yeesho shirkadaha isgaarsiinta, warbaahinta baahisa iyo daneeyayaasha kale, si loo horumariyo nidaamyada qaran ee digniin-bixinta Soomaaliya.
Iyadoo hoggaaminaysa Tiirka 3-aad ee hindisahan, HIQ waxay taageertaa horumarinta habraacyada isgaarsiinta ee wadashaqayn kara, xoojinta kaabayaasha dhijitaalka ah iyo kuwa raadiyaha, iyo kor u qaadidda wacyigelinta iyo u-diyaargarowga bulshada ee khataraha la xiriira cimilada.
Hay'adda waxaa ka go'an ka faa'iidaysiga teknoolojiyadda iyo siyaasadda si loo xaqiijiyo in digniinaha hore ay noqdaan kuwo la heli karo, loo dhan yahay, isla markaana wax laga qaban karo, taas oo ugu dambayn ilaalinaysa nafaha iyo hab-nololeedka bulshada dalka oo dhan.